Unha de microrrelatos

Nesta presentación veredes unha pequena introdución teórica sobre o concepto do microrrelato e a seguir, unha pequena selección de microcontos realizados polos meus alumnos e alumnas durante estes anos. Espero que vos gusten.  

Dez razóns para desertar da III Guerra Mundial

"A música militar nunca me soubo erguer". Georges Brassens

A guerra é incompatible coa paz e como os meus alumnos son xente de ben, déronme 10 razóns para desertaren dunha posible III Guerra Mundial:

• A cor do uniforme non pega coa cor dos meus ollos.
• Obedecer nunca foi o meu.
• Miña nai vaime dar unhas cachetadas se sabe que vou.
• O fume faime esbirrar.
• Prefiro saltar á comba que saltar polos aires.
• Quero mellor un bombón ca unha bomba.
• Son moi nova para morrer nova.
• Sábenme máis os polvoróns que a pólvora.
• Teño as balas atravesadas.
• Non me gusta contar batalliñas.

  
Vídeo de Gila en https://www.youtube.com/watch?v=4NkaGhMtIF0

Descenso preocupante do uso do galego entre a xente nova.

Segundo unha enquisa realizada polo IGE no ano 2014, tres de cada catro rapaces e rapazas de menos de 15 anos é castelanfalante, o mesmo dicimos de dúas de cada tres persoas entre 15 e 29 anos. O galego xa é só maioritario entre os maiores de 50 anos.

Estamos a falar nada menos que dunha caída nos últimos anos, de once puntos (do 26% ao 15%) dos galegofalantes habituais entre 5 a 14 anos, tal como salientou a asociación Prolingua.

A Mesa pola Normalización Lingüística sinala que os datos aportados polo IGE son un "reflexo da situación na que se atopa a lingua na sociedade" e "o resultado de anos de incumprimentos e ataques ao galego por quen ten a obriga legal de defendelo". A Mesa responsabilizou deste escenario á política lingüística aplicada, "consistente en ter un certo corpo legal que despois non se aplica".

O escritor Xabier P. Docampo no seu artigo "Non falan porque non saben", culpa desta situación ao decreto do plurilingüismo da Xunta do ano 2009, que pillou a eses mozos e mozas cando tiñan 5 anos e que hoxe son castelanfalantes, non porque prefiran o castelán ao galego, senón porque simplemente non saben falar o galego.
                                                 

 

Xa que logo, e á vista da falta total de apoio institucional está nas nosas mans que o galego dure mil primaveras máis.

Vídeo de youtube de Loli Cid. "Mil primaveras máis" 
Viñetas de Xaquín Marín tiradas de http://edelingua.blogspot.com.es/p/vinetas-pola-lingua.html e 
                                       

Unha receitiña para ser profesor/a hoxe...

Imos aló! 

                                      INGREDIENTES                                           

120 grs de creatividade      

80 grs de vocación

5dl de método

½ quilo de paciencia

3 culleradas de claridade

Raspas de retranca

½ quilo de ilusión

3 follas de firmeza

2 culleradas de sorriso afable.

PREPARACIÓN

Nun centro educativo de Galiza, cuxo nome  non debe importar, botamos  toda a VOCACIÓN, e por riba dela,a PACIENCIA  mesturada  coa RETRANCA , a CLARIDADE, o MÉTODO, e mais a FIRMEZA  esluída no SORRISO AFABLE.

A  seguir imos colocando a CREATIVIDADE derredor do centro educativo e despois recubrimos todo  coa ILUSIÓN.

Deixamos arrefriar a preparación un tempiño para adquirir  OFICIO. 

CONSELLOS DA CHEF

• Para  manter a ILUSIÓN recubrímola con xelea caseña de  ACTIVIDADES COMPLEMENTARIAS  E EXTRAESCOLARES.
• A FIRMEZA ten que ser da mellor calidade, caso contrario, o/a  profesor/a  esmorece axiña. Non escatimemos nela! 
• Evitar edulcorantes artificiais como a  PALABRERÍA PSICOPEDAGÓXICA  baleira de contido.
• Se a receita non sae as primeiras veces ou en calquera outro momento,  aumentaranse as doses de  PACIENCIA e de SORRISO . En casos de papás e mamás  rallantes ou compañeiros nugalláns e resabiados , unhas raspiñas máis de RETRANCA son perfectas. 

                                     BO PROVEITO!

Imaxe tirada de https://www.pinterest.com/claudiaribeirao/chefs-de-cuisine-images-works-cross-stitch-etc/

Vídeo: https://www.youtube.com/watch?v=YXuB6md9zPk   

Revista retranca: aretranca.blogspot.com.es

www.belenmartinfranco.com